АБАЙ МУЗЕЙІНДЕ ОТЫРАР КӨРМЕСІ АШЫЛДЫ

Абайдың «Жидебай-Бөрілі» мемлекеттік қорық-музейіне «Отырар мемлекеттік археологиялық қорық-мұражайының» қызметкерлері іс-сапармен қонаққа келді. Отырар қорғанына 800 жыл толуына орай «Қамалы бекем, халқы қайсар – Отырар» тақырыбында құрылған жылжымалы көрмесінің ұлы ақынның музейінде салтанатты ашылуы өтті.

Шараның алғы сөзін Абайдың «Жидебай-Бөрілі» мемлекеттік қорық-музейінің директоры Ерлан-Бек Мейрамхатұлы сөйлеп, Отырар музейінің бас қор сақтаушысы Ералы Төлендіұлы көрме барысымен таныстырды. Айта кететін жайт, көрме төрт бөлімнен тұрады. Көрмеге Отырар қорғанынан табылған көне заттардың 200 түрі қойылған.

Сондай-ақ, салтанат соңы әсем әнмен түйінделіп, көрмеге экскурсия жүргізілді. «Қамалы бекем, халқы қайсар – Отырар» көрмесі Абай музейінде бір ай бойы келушілер назарына ұсынылады.

 

Абайдың «Жидебай-Бөрілі»

қорық-музейінің баспасөз қызметі